Voll ine - Der Sportpodcast

Die 213ti Folg vu VOLL INE isch eigentlich en Recap vude erste WM Wuche. Perfekt für so lüüt wie de Andri wo ned am morge am 6ii ufstönd zums WM Bedürfnis befriedige. Zum Glück hemmer üse Experte Onkel Osci wo alli Infos, Zämefassige und fun facts no im chopf hed! Nebst de einzelne Matches wo ufgarbeitet werdet gits auno en Iblick die persönliche Sphärene vude beide Hosts, zum Bispiel wieso de Andri mitm Voll Ine Number One Nici Huber unterwegs gsi isch und de Osci weiss, das de Patrick Fischer noni ganz mitm Verband abschlosse hed…zum Schluss wird auno Velofahre, Formel 1, Liechtathletik und Hockey zumne guete Abschluss agschnitte. Blibed dra und gönd VOLL INE!

Mitem hüttige Gast wird Voll Ine scho fascht zum offizielle Podcast vu Swiss Ski. Wemmer d Lea Meier kennelernt merkt mer schnell, sie ghört eigentlich scho lang zude Voll Ine Family. Sympathisch, Sportlich und ufgstellt sind numme es paar Charaktereigeschaft wo sich i dere Folg ganz klar zeiged. D Lea isch Biathletin und hed im letzte Winter ihri Position ide Weltspitze und ade OLYMPISCHE Spiel chönne etabliere. Nebst ihrne Leistige ufem Schnee verzellt üs d Lea aber no viel meh...wieso Atmig generell unterschätzt wird und woher dasses chunt, dass Biathlon eini vude meistverfolgte Wintersportarte isch aber ide Schwiiz no chli Startschwierigkeite hed. Das alles und no viel meh bi VOOOOOLL INE!_______De Voll Ine WM Tippgruppe bihtrete und geili Prise gwünne!

De Schmerz leid sich numme langsam nach de verlorene Niederlag vude Schwiizer Ishockeynati. Au bim Osci und Andri sitzt de Schock no tüüf. Was hilft da besser als mit guete Kollege rede und das ganze z analysiere und verdaue? Doch de nächst Hype-Train staht scho ufem Fahrplan: D Fuessball WM i einere Wuche! Wenner wend Tipps fürd d Tippgruppe ha denn müender unbedingt lose, wer das Jahr Weltmeister wird. Zuedem verzellt de Andri vude Krawall in Paris, wo er live debii gsi isch…(ohni illegali Aktione verstaht sich). Zum Schluss gits no chli Giro und Tennis zum Dessert. Was füren grandiose Sportfrüehlig bis jetzt und de Summer wird ned schlechter!! Drum Voll Ine lose und uf de Reis debii sii!_______De Voll Ine WM Tippgruppe bihtrete und geili Prise gwünne!

De Lenz Hächler gilt als eini vo de spannendste Schwizer Ski-Hoffnige für die nächste Jahr. Junioreweltmeister im Slalom, Europacup-Gesamtsieger, Weltcup-Fahrer und jetzt mit fixe Startplätz in allne Diszipline: De Zuger bringt alles mit, was es für e grosse Karriere respektive de Gsamtweltcupsieg brucht.Ih dere Folge reded mir mit Lenz über sin Weg vom Nachwuchstalent bis is Swiss-Ski-Team, über sini stark Europacup-Saison, de Sprung in Weltcup und was sich ändert, wenn plötzlich alles schneller, grösser und lüter wird. Natürlich gahts au um de Vergleich mit Marco Odermatt, Erwartigsdruck vo usse und d’Frag, wie mer als junge Fahrer sin eigen Weg findet.Mir redet aber nöd nur über Resultat und Rangliste. De Lenz verzellt, wie viel Skatepark und Freestyle i sim Skifahre steckt, warum Style und wildi Frisure irgendwie zu ihm ghöred und wie er mit Verletzige, Risiko und Rückschläg umgaht. Dazu gahts um sini Disziplinewahl, sini Rolle im Swiss-Ski-Team und de Blick uf die nächst Saison mit em Highlight Adelbode.E Folge über Talent, Tempo, Druck, Lockerheit und e Skifahrer, bi dem mer s’Gfühl het: Da chunnt no einiges. Darum, wie immer, VOLL INE lose!

Die 209ti Folg vum Voll Ine Podcast startet direkt mit de Abfahrt vum Hype-Zug Richtig Ishockey WM Final. Es brucht ned viel (ussert 4 Sieg vude Schwizer Nati) und d Jungs sind scho wieder voll im WM Fieber (zmindest de Osci)! Wieso de Osci während de WM Ziite auno Strava KOMs jagt und de Andri wieder als Bünzli beschumpfe wird isch au Teil vu dere Folg. Welle Boomer hed eigentlich d Bekanntgab vum Schwiizer Kader fürd Fuessball WM erfunde? Das und vieles meh wird im hüttige knackige Podcast alles beantwortet. Drum loset Voll Ine und läbed (ned) wie de Jamie Vardy!

De Matthias Iten isch de 11. Zuger Sportler bi Voll Ine und eine, wo im Schwizer Skisport grad richtig spannend isch. De Slalomfahrer us Unterägeri het sich über de Europacup Schritt für Schritt bis in Weltcup kämpft. Spötistens sit sim starche 10. Platz im Slalom vo Val d’Isère, wo er mit Startnummer 61 grad no als 30. in zweite Lauf cho isch, isch klar: Dä Zuger isch im Slalom definitiv ahcho.In dere Folge redemer mitem Matthias über sini Saisonvorbereitig, de lange Weg dür de Europacup, sini Verbindig zum Kanton Zug und über d'Frag, wie mer überhaupt Slalomfahrer wird, wenn mer us Unterägeri chunnt. Mier wänd wüsse, wie dä Summertraining-Alltag usgseht, was wichtiger isch: Kraft, Stabilität, Beweglichkeit oder Skitäg – und obs Trainingsblöck git, wo sogar en Profi am liebste überspringe wür.Es gaht aber au um die härtere Site vom Spitzesport. De Matthias het jahrelang mit Ruggeprobleme kämpft und öffentlich drüber gredt, dass Rücktrittsgedanke meh als einisch es Thema gsi sind. Mir redet mit ihm drüber, wie präsent dä Ruffe hüt no isch, wie mer trainiert, wenn de Körper Grenze setzt, und was ihn trotzdem immer wieder zrugg an Start bracht het.Natürlich lueged mir au uf sini letzte Saison und de Durchbruch im Weltcup. De 2. Platz im Europacup-Slalom vo Levi het früeh zeigt, dass öppis möglich isch. Kurz druf folgte in Val d’Isère de grossi Moment: Startnummer 61, schwierigi Piste, grad no qualifiziert und am Schluss Top 10. Genau über so Täg wänd mir rede: Was lauft im Chopf? Merkt mer vor em zweite Lauf, dass öppis möglich isch? Und wird de Olympia-Traum plötzlich griffbarer, wenn d’Resultat stimmed?Jedefalls isch Letschteres spötistens Tatsach gsi bim grosse Saisonhighlight: Wie fühlt sich das a, vor heimischem Publikum in Wengen mit grüener Ziitahzeig is Ziel zfahre? Was passiert im Chopf, wenn plötzlich nöd nur es Weltcup-Bestresultat (6. Rang), sondern au de Olympia-Traum ganz real wird? Und wird de Druck chli chliner, wenn d’Kriterie erfüllt sind oder erst recht grösser, will de Traum plötzlich echt isch?Es erwartet dich en Folg über Slalom, Durchhaltewille, Rückschläg, Weltcup-Momente und de realisierti Traum vo Olympia. Also en Folg für alli, wo de Schwizer Skisport nöd nur über Rangliste verfolged, sondern d’Gschichte dehinter wänd verstah. Darum, wie immer, VOLL INE lose!FOTO CREDITS Reto Müller. Instagram: @remuesports

S Jahr 2026 wird sportlich gseh ide Schwiiz ned so schnell vergässe gah. Zwei Meister, so ungwöhnlich, dass mir hüt gad en ganzi Folg drüber machet. Nach es paar News usem Voll Ine Universum gads direkt los mit Fribourg Gottéron, neue Schwiizermeister im Ishockey! Mir tauched i das Märli i und gönd dene vergossne Träne uf de Grund. De Verglich zum Überraschigsmeister FC Thun wird natürli au gmacht. Am Schluss stellt sich d Frag: Welle Meistertitel isch schöner? Das und au biz Pogi-Mania gits ide Folg #207 vum grandiose VOLL INE Podcast.

Was für de Fischi, de Schwizer Ishockeyverband und d Nati en schlechti Usgangslag isch, isch für Voll Ine wie wenn am 5i am morge  nachem Usgang no in McDo gasch: Ultra geil!!! Mir lönd üs das Menü ned entgah und kläred de ganz Fall Fischer uf. Eusi Meinige sowie die vum Klaus Zaugg werdet diskutiert und usenand gnoh. Ned weniger erfahrsch debi über de Osci und de Andri persönlich. Das vum Afang a. Also inne lose wenns heisst: VOLL INE